Auraiya Murder Case: Pragati Yadav ki Dhokhebhari Prem Kahani

Auraiya, Uttar Pradesh – ek naam jo ab ek dil-dahla dene wale sachche pyar, dhokhe aur laalach ki kahani se jud gaya hai. Pragati Yadav aur Dileep Singh Yadav ki shadi, jo sirf 12 din pehle khushi se hui thi, ek maatam mein badal gayi jab Dileep ki maut ek gehre raaz ka parda kholti hai. Kya yeh sirf ek hadsa tha, ya phir ek sochi-samjhi saazish, jiske taar uske apne hi ghar se jude the? PoliceCrimes.org ki yeh investigative report aapko pyar, paisa, aur insaaniyat ke andhere pehluon se rubaru karayegi, jo Auraiya Murder Case ki har parat ko kholti hai.

Yeh sachchi ghatna police records aur sthaniya media reports par aadharit hai.

Pyar, Dhokha aur Khoon ki Sachi Kahani: Auraiya ka Sach

17 March 2024, ko record hui iss video mein Pragati Yadav apni shadi ke baad khushi se reel banati dikh rahi hai. Iss khushi ki wajah hai Pragati ka 3 saal purana pyar, Dileep Singh Yadav, jiske saath uski matr 12 din pehle, yani 05 March 2024, ko love marriage hui thi [Aaj Tak].

Yeh khushi isliye badi lag rahi thi kyunki kaafi koshisho ke baad dono apne gharwalo ko shadi ke liye mana paaye the. Shadi ke shuruati dinon mein hi Pragati ne apne sasural mein sabka dil jeet liya tha. Dileep ke ghar mein khushiyon ne dastak de di thi. Lekin kisi ko khabar nahi thi ki in khushiyon ke peeche-peeche ek maatam dabe paav aa raha tha. Yeh Auraiya Murder Case ki shuruaat thi, jismein Pragati Yadav ka sach samne aane wala tha.

Dileep ka Gayab Hona: Auraiya ka Khooni Raaz

19 March 2024, Auraiya ke Dibiyapur mein rehne wale Dileep ki shadi ko sirf 14 din hi hue the. Holi ka tyohaar manane ke baad wo apne kaam pe laut gaya aur apna kaam khatam karne ke baad ek restaurant pe khana khane ruka. Usne apne bade bhai Sandeep aur wife Pragati ko call karke bataya ki uska Bela gaon mein kaam khatam ho gaya hai aur ab wo ghar wapis laut raha hai. Usne yeh call Bela gaon se ki thi, jo uske ghar Dibiyapur, se sirf 27 km hi dur tha [Live Hindustan].

Ghar se matr 40-50 minutes ki duri pe tha. Magar jab Dileep der shaam tak ghar nahi lauta, toh parivar walo ne uska location janne ke liye call kiya. Lekin usko call nahi lagi. Pehle sabko laga ki kisi kaam se Dileep kahi ruk gaya hoga. Lekin jab Dileep der raat tak bhi ghar nahi lauta, nahi uski koi call aayi, toh sabko bahut chinta hone lagi.

Isliye phir sabne usko call kiya, iss baar usko call toh lagi aur Dileep ke phone se aawaz aayi. Wo sunke gharwalo ke pairon tale zameen nikal gayi, kyunki Dileep ke phone se yeh phone Auraiya police uthati hai aur unko batati hai Dileep buri tarah se ghayal hai aur hospital mein admit hai. Jo insaan kuch ghanto pehle bilkul sahi salamat tha, uski aise khabar gharwalo ke liye ek sadma thi. Police ne Dileep ki halat ko gambhir bataya. Khud ko sambhalte hue hospital poochte hain jahan Dileep zindagi aur maut ke beech lad raha tha.

Dileep ki aisi halat dekh unhe samajh nahi aa raha tha ki yeh sab kaise ho gaya. Wo yeh soch soch kar bhi pareshan the ki Pragati ko is hadse ke baare mein kaise batayein. Himmat karke unhone Pragati ke gharwalo ko iss hadse ke baare mein bataya. Pragati jaise hi yeh khabar sunti hai, uske upar ek pahad toot jaata hai aur uska toh ro ro ke bura haal ho jaata hai.

Pragati ke gharwale usko bahut sambhalne ki koshish karte hain, par uske aasu toh rukne ka naam nahi le rahe the. Pragati ke thoda sambhalne ke baad wo usko hospital leke aate hain, jahan Dileep admit tha. Auraiya murder case ki yeh shuruaat ek anjaan saazish ki taraf ishara kar rahi thi.

Maut ka Sach: Auraiya ka Postmortem Report

Dileep ko hospital mein aisi halat mein dekh Pragati phoot phoot kar rone lagti hai. Magar samay ke saath hospital mein Dileep ki halat aur kharab hoti jaa rahi thi. 2 din zindagi se jung ladte ladte usne aakhir mein dum tod diya [Hindustan Times]. Police ne is mamle ki gehri jaanch shuru kar di thi.

14 din pehle jis shadi ki khushi mein yeh parivar jee bhi nahi paaya tha, wahi khushi maatam mein badal gayi. Iss parivar ko bilkul bhi bhank nahi thi ki Dileep ki maut ek hadsa nahi balki ek sochi samjhi saazish thi. Dileep ki aayi postmortem report ne aise khulase kiye jo sachai ki parat ko khulte chale gaye.

Postmortem report ke according uske sar pe itne gehre ghav kiye gaye ki uska skull buri tarah se fractured ho gaya tha. Yeh hi nahi, itni chot dene ke baad uske sar pe peeche se goli maari gayi thi. Iss apradh ko jis tarah se anjam diya gaya tha, usse yeh saaf pata chal raha tha yeh koi aam loot paat ka case nahi hai balki koi gehri saazish thi jiske taar ek aise insaan se jude the jo unhi ke parivar mein tha. Police ke liye ab Pragati Yadav aur uski prem kahani ek shuraati bindu ban chuki thi.

Dileep Singh Yadav: Ek Khushaal Parivar aur Anjaan Khatra

Auraiya ka rehne wala 21 saal ka Dileep Singh Yadav apne teen bhai Sandeep, Akshay aur Sachin ke saath milkar apne pita Sumer Singh ke shuru kiye hue Crane ke business ko aage bada raha tha. Pita Sumer ke paas 12 hydra machines aur 10 cranes thi. Unka kaam UP ke 4 district mein fela hua tha. Rupey paise se dhani yeh parivar ab khushiyon ke rang mein bhi rangne wala tha.

Kyunki 5 March 2024, ko Dileep ki shadi Phaphund ki rehne wali Pragati Yadav ke saath hone wali thi. 12th standard tak padi Pragati Yadav koi aur nahi balki Dileep ke bade bhai Sandeep ki saali thi, jiske saath wo 3 saalo se relationship mein tha. Lekin Pragati ke saath shadi ke liye apne parivar ko manane ke liye bahut papad belne pade the.

Kyunki pehle Dileep ke parivar ko unke dono ke rishtey ke baare kuch pata nahi tha aur iss wajah se wo Dileep ke liye ladkiyan dekh rahe the. Jab unhe iss rishtey ke baare mein pata chala, unhone iss se inkaar kar diya. Wo nahi chahte थे ki ek hi parivar se do ladkiyan unke ghar mein bahu banke aaye. Magar Pragati ne Dileep se bol diya tha ki kuch bhi ho jaaye wo shadi karegi toh sirf Dileep se karegi aur Dileep bhi yeh hi chahta tha. Aakhir kar dono ki zid ke aage sabko jhukna pada. Unki dono ki khushi ke liye maan gaye, finally 5 March 2024 ko dono ki badi dhum dhaam se shadi ho jaati hai.

Iss shadi se dono bahut khush the. Poora parivar Dileep aur Pragati ke liye bahut khush tha magar Dileep aur Pragati ke saath jo hone wala tha wo shayad hi kisi ne socha bhi hoga. Hindu riti riwaz ke mutabik shadi ke 4th din yani 9 March 2024, Pragati apne piyar chali jaati hai. Wahi Dileep apne parivar ke saath Holi ka tyohar mana kar 19 March 2024 ko kaam par laut jaata hai. Dileep Bela gaon mein saare kaam khatam karke wapis ghar laut raha hota hai aur yeh baat wo call kar apne bade bhai Sandeep aur wife Pragati ko batata hai.

Jahan ek taraf Dileep ke gharwale uska intezaar kar rahe hote hain wahi dusri taraf Paliya gaon ke paas gehu ke khet mein do gaon walo ko ghayal ek aadmi pada milta hai. Usse mara hua soch kar wo dono dar ke karan wahan se bhaag jaate hain, baaki gaon walo ko apne saath leke wahan aate hain. Uss aadmi ko buri halat mein dekh gaon wale turant iss ghatna ki suchna police tak pahunchate hain, wo wahan furan ambulance ko saath leke wahan pahunchti hai. Medical staff jab uss aadmi ko check karta hai toh uski saasein abhi bhi chal rahi thi, isliye bina deri kiye wo usse ambulance se turant hospital leke jaate hain. Uska ilaaz shuru karate hain. Yeh sab Auraiya Murder Case ke pehlu the.

Operation Trinetra: Auraiya Police ki Koshish

Police mamle ki investigation shuru hi karti hai, ki uss aadmi ki pocket mein mila phone bajne lagta hai. Police jab phone receive karti hai, call uss taraf koi aur nahi balki Dileep ke parivar wale the. Police se baat karke Dileep ke ghar mein kohram mach jaata hai. Aur sabhi bhaagte hue hospital pahunchte hain jahan uski halat dekh hospital mein rona peetna shuru ho jaata hai.

Kuch der baad doctor police ko batate hain kisi ne Dileep ke sar par gehre vaar kiye hain aur usse goli bhi maari hai. Shuruwat mein police isse ek accidental case maan kar chal rahi thi. Par sar mein bullet ka milna ek badi saazish ki aur ishara kar rahi thi. Yani pehle Dileep ko behreymi se peeta gaya tha aur phir usse goli maar di gayi. Issi karan se police jab Dileep ke parivar se poochti hai ki kya Dileep ki kisi ke saath dushmani thi. Toh parivar wale inkaar karte hue kehte hain ki unka ladka bahut sidha tha aur wo sirf apne kaam se matlab rakhta hai. Nahi uska kisi se koi ladai thi aur na hi koi dispute tha. Khudko sambhalte hue Dileep ki family mamle ki jaanch ke liye FIR karati hai. Report hone ke baad police apni investigation shuru karti hai.

Lekin Dileep ki condition itni serious thi ki sirf 2 din baad yani 21 March 2024, wo zindagi ki jung haar gaya. 15 din pehle jis ghar mein shadi ki dhum dham thi, aaj wo hi ghar gum mein khoya hua tha. Dileep ka ghar bahut dukhi tha apne jawan bete ki maut ka dukh toh tha hi par saath hi chinta thi apni bahu Pragati ki. Pragati abhi bhi sadme mein thi. Jo sunke police ke bhi kaan khade ho gaye the.

Poochtaaz ke baad yeh toh clear ho gaya tha ki Dileep ke saath Bela aur Dibiyapur ke beech yeh incident hua hai. Uske liye police Trinetra System ka use karti hai. Operation Trinetra Uttar Pradesh government ke dwara shuru kiya gaya abhiyaan hai jiske tahet 1000 cameras, strategic points, crime ke hot spots, dark spots aur highways mein install kiye gaye hain. Yeh sabhi cameras control room se connected hain [Live Hindustan]. Police issi system ka use kar uss route ko dhundna shuru karti hai jisse Dileep Bela se ghar laute dikha ho. Saath hi Dileep ke apne bhai Sandeep se hui aakhri baar baat hui timing ke aas paas ke footage ko check karti hai.

Police uss route ke sabhi CCTV footages dekhne mein lagi hoti hai, ki tabhi unhein Paliya Gaon ki taraf jaate waqt sadak mein lage camera footage mein Dileep bike par do logo ke saath jaate dikhta hai. Yeh Auraiya Murder Case ki jaanch mein ek mahatvapurna mod tha.

Anurag Yadav: Pragati ka Premi aur Saazish ka Mastermind

Dileep ke saath yeh do log kon the? Yeh janne ke liye police unki identification shuru karti hai. Jo information unhein milti hai wo behad shocking hoti hai. Dileep ko bike par baitha kar le jaa raha insaan ek bahut hi khatarnak mujrim aur history sheeter Ramji Nagar tha jo kai khatarnak cases mein jail jaa chuka tha aur uss waqt bail ke chalte jail se bahar aaya hua tha [Hindustan Times].

Dileep ke jaise sidhe sadhe aadmi ke saath ek khatarnak mujrim ka dekhe jaana apne aap mein ek red signal tha, isliye police ki ek team bina der kiye Ramji Nagar ko dhundti hai aur usse pakad kar poochtaaz shuru kar deti hai. Pehle toh Ramji Nagar ne kuch nahi kabul kiya lekin jab police ne apne tariko se poochha toh wo unhe batata hai, ki uska Dileep ke murder ka contract Anurag Yadav naam ke insaan ne diya tha. Iske baad, Auraiya Murder Case ki asli kahani samne aane lagi.

Pragati Yadav: Bahu ya Qaatil? Auraiya ka Sabse Bada Dhokha

Lekin yeh case itna simple nahi tha kyunki Anurag Yadav ke arrest hote hi police ki ek team Dileep ke ghar pahunchti hai jahan maatam ka mauhul hai. Aur parivar ke saath gaon wale bhi baithe the. Police wale Pragati ko bulate hain aur usse kuch poochte hain. Parivar walo ko laga ki case ke silsile mein wo Pragati se poochtaaz kar rahe hain. Lekin achanak police ke saath aayi lady constable Pragati ka haath pakad apne saath le jaane lagti hai.

Yeh dekh wahan aaye parivar aur gaon ke log bhadak jaate hain. Aur wo gusse mein police ka rasta rok kar poochte hain ki aakhir wo unki bahu ko aise kaise leke jaa sakte hain. Ab jawab mein jab police ne jab reason dena shuru kiya toh unke ek ek shabad pe wahan maujood sabhi logo ke liye vishwas kar paana mushkil tha. Kyunki police yeh batati hai ki Dileep ke murder ke peeche unke hi ghar ki bahu aur Dileep ki wife Pragati ka haath hai [Live Hindustan].

“Pehle ghar ke chhote bete ki maut aur uske baad uski maut mein ghar ki bahu ka haath hona. Yeh sunte hi poore parivar ki zindagi hil jaati hai.”

Yeh vishwas karna poore parivar ke liye mushkil tha ki jis Pragati ko Dileep se itna pyar tha, jo uske saath 3 saalo se rishtey mein thi. Aur jis Dileep se usne shadi karne ke liye sabse zid ki thi aur apni marzi se shadi ki thi. Aakhir usne hi Dileep ko maut ke ghaat utarwa diya.

Iss khooni khel ke peeche jo wajah samne nikal ke aayi wo dikhayega ki aaj ke iss daur mein pyar ko insaan rupi in rakshason ne apne laalach ke chalte pyar ko sirf ek khel bana ke rakh diya hai. Yeh hai Auraiya Murder Case ki sachchai jahan Pragati Yadav ka dhokha samne aaya.

2020: Jahan Se Shuru Hui Thi Khooni Prem Kahani

Iss case ko puri tarah se samjhne ke liye chalte hain 5 saal pehle yaani saal 2020 mein, jahan se iski shuruwat hui thi. Saal 2020, Phaphund ki rehne wali Pragati Yadav ke ghar se sirf 100 meter dur hi Anurag Yadav rehta tha. 29 saal ka Anurag Jhinjhak se BCA karne ke baad gaon mein hi aake rehne laga tha.

Uske paas pehle hi koi kaam dhanda bhale hi nahi tha magar jhooti shaan bhari zindagi ka dikhawa zaroor karta tha. Branded kapde aur shoes pehenna, costly gadiyon se gaon mein ghoomna, flight se travel karna, aur costly hotel mein rukna. Anurag aisi zindagi ka show off kar apna rutba poore gaon mein dikhta tha. Aur wo yeh sab apne dosto aur rishtedaaron ke paise se karta tha kyunka asliyat mein toh uske khud ki ek bike bhi nahi thi. In reality wo apna kharcha chalane ke liye tractor bhi chalata tha. Anurag ki issi jhooti zindagi ko dekh Pragati usse attract hone lagi thi.

Dono ke ghar bhale hi aas paas the magar dono parivaron ke beech kaafi duriyan thi. Zameen ki ladai ke chalte, dono parivar ke beech jhagda bhi hua tha aur mamla police tak bhi gaya tha. In ladaiyon ke chalte Pragati sabke samne Anurag se baat nahi kar paati thi. Lekin usse dekha zarur karti thi. Wahi Anurag bhi Pragati ko pasand karta tha.

Ek din jab Pragati janwaron ka chara dene gayi, toh Anurag mauka paake ek paper per apna phone number likh Pragati ko pakda deta hai. Usse phone karne ko bolta hai, ab Pragati ke paas khud ka koi phone nahi tha. Isliye wo apne gharwalo ke so jaane ke baad apne pita ke phone se Anurag ko call kar usse baat karti hai. Yeh silsila kai dino tak chala. Phone par shuru hui baat mulakaton mein badal gayi.

Pragati ki mausi ka ghar Auraiya shehar ke paas tha, jahan wo apni maa ke aksar jaaya karti thi. Wo mausi ke ghar se Sai mandir jaane ke bahane ghar se nikalti thi aur Anurag ko milne ke liye bula leti thi. Phir dono ek hi hotel mein har baar mila karte the. Dono ke beech shuru hui aashiqui iss had tak badh gayi ki Pragati ke bolne pe Anurag ne apna asli naam Manuj Kumar badal kar Anurag Yadav rakh liya tha.

Starting mein toh Pragati aur Anurag ke iss relation ke baare mein unke gharwalo ko koi idea nahi tha. Lekin jyada dino tak yeh sach chhip nahi paaya. Aur yeh baat dono ke gharwalo ko pata chal gayi. Pragati ke gharwale iss rishtey ko nahi apna rahe the. Lekin Pragati Anurag se hi shadi karna chahti thi. Issi baat pe Pragati ka apne gharwalo se roz ladai hoti thi. Anurag se shadi karne ka junoon itna tha ki apne gharwalo ko darane ke liye usne ek baar apni nas tak kaat li thi.

Anurag jis hi-fi lifestyle ke sapne Pragati ko dikha raha tha, wo unhi ko sach maan baithi thi. Usse lagta tha ki Anurag ke saath uski life ek fairy tale jaisi hogi. Lekin yeh hi usko bade sapno ki wajah nahi thi, Pragati ki badi behen Parul ki shadi 2019 mein ek crorepati ghar mein ho gayi thi. Wo apni behen ko achi life aur saari ichhayein pura karte dekhti thi. Apni behen ki achi life ko dekh kar aur Anurag ki baato mein aake wo bhi apni life shani shaukat se jeena chahti thi.

Pragati ko achhe se pata tha ki family dispute ke chalte Anurag se uski shadi nahi ho paayegi. Aur ho bhi jayegi toh Anurag usse wo life nahi de payega jo wo jeena chahti thi kyunki wo itna ameer hai nahi. Pragati ke sapne kaafi bade the aur wo in sabhi sapno ko asliyat mein bhi jeena chahti thi magar Anurag ke saath. Ab Pragati Anurag ke dimaag mein aisa haiwaniyat ka beej bone wali thi, jisse uske lalchi iraade pure ho sakte the. Yeh Anurag aur Pragati Yadav ki prem kahani ki shuruaat thi, jo Auraiya murder case mein badalne wali thi.

Mohabbat ka Dhoka: Pragati ki Saazish ka Aagaaz

Saal 2022, Pragati ki behen Parul ki jis ghar mein shadi hui toh wo bahut paise wala tha. Aur uss ghar ka chhota beta Dileep bhi unmarried tha. Kyunki Pragati ka apni behen se milne ke liye uss ghar mein aana jaana laga rehta tha, wahi Dileep bhi apne bhabhi ke piyar aata jaata rehta tha. Issi wajah se Pragati ki Dileep se aksar mulakat hoti rehti thi aur yahi se Pragati ko Dileep apne sikaar ki tarah nazar aane laga tha.

Pragati ne apni sochi samjhi chaal ke karan pehle Dileep se dosti ki phir milne julne ke bahane usse kareeb aayi. Pragati ke feke gaye jaal mein Dileep fas gaya tha. Ab Pragati ne apne asli iraado ko chhupa kuch hafte mahine nahi balki 3 saalo tak pyar ka natak karti rahi. Issi natak ke beech usne Dileep ko Anurag se bhi milwaya. Sirf milwaya nahi balki dono ke beech dosti bhi kara di. Kyunki wo dono ek dusre ko Instagram pe follow karte the. Dileep aksar Anurag ki post ki gayi photos pe comment bhi karta tha. Bechare Dileep ko toh bilkul idea nahi thi jis Anurag ko Pragati apna dost batake milwa rahi hai wo uska premi hai.

Dono ne milkar Dileep ke bholepan ka fayda utha rakha tha. Dono ke plan ke according wo Dileep ko ahsaas dila chuki thi wo Dileep ko pyar karti hai, uske bina jee nahi payegi. Dileep uske iss jaal mein fasta chala gaya yaha tak Pragati se shadi karne ke liye apne gharwalo ke against jaa kar zid par ad gaya tha ki wo shadi karega toh Pragati se hi karega. Kitni dukh ki baat hai ki jahan ek taraf Dileep pyar ke liye apne gharwalo ko manane ke liye lad raha tha udhar yeh dhokebaaz ladki pyar ke naam par charkravyuh bana usse khatam karne ka plan bana rahi thi.

Aakhir kar half plan toh successfully pura ho gaya tha jab Dileep ke gharwalo ki marzi se dono ki shadi ho gayi thi. Yeh ladki itni shaatir thi ki usne iss bhole chehre ke peeche apne asli rang ko chhupa rakha tha. Jahan uska shaitaani dimaag Dileep ko khatam karne mein laga tha wahi wo chehre pe muskurahat dikha Dileep ke gharwalo ka dil jeet rahi thi. Saari rasmein puri ho jaane ke baad Pragati chaturthi ke baad apne ghar chali jaati hai par uski asli wajah yeh bhi thi wo Anurag se milne ke liye tadap rahi thi. Auraiya Murder Case ki yeh saazish ab gehri hoti ja rahi thi.

17 March 2024: Maut ki Supari aur Lalach ka Khel

17 March 2024, ko ussi hotel mein jaati hai jahan wo hamesha Anurag se mila karti thi. Aur wahi par wo yeh kuch reels banati hai. Reels ko dekh ke toh lagega ki Pragati apni shadi se bahut khush hai par iss hotel mein wo Anurag ke saath apne plan ko aakhiri anjam tak pahunchane wali thi. Shuru se hi Pragati ki planning thi ki Dileep ko pyar ke jaal mein phasane ke baad usko maar ke khatam kar denge. Wo yeh sab isliye kar rahi thi, kyunki wo Dileep ki karodo ki sampatti paana chahti thi. Taki uss daulat ke saath wo Anurag ke saath achi life jee sake [Aaj Tak].

Iss murder ko execute karne ke liye Anurag ne apne mausere bhai Durlab Yadav ko iss plan ka hissa banaya. Jo ki ladai jhade aur criminal background ka tha. Durlab ne poore mamle ko samjhne ke baad apne dost history sheeter Ramji Nagar ko hire kiya. Ramji Nagar ne Dileep ko maarne ke liye 2 lakh rupees ki supari li. Jismein 1 lakh kaam se pehle aur 1 lakh kaam ke ho jaane ke baad.

Problem yeh thi ki Pragati aur Anurag dono ke paas itne paise nahi the. Isliye Pragati ne dimaag laga kar muh dikhayi mein mile 70 hazaar apne paas hi rakh liye aur baaki ke 30 hazaar usne Dileep se hi maang liye. Apne pyar aur biwi ke iraado se anjaan Dileep ko bilkul bhi bhanak nahi thi ki ussi ke paise se ussi ki maut ki supari de jayegi.

Ek taraf Pragati ne 1 lakh ka intejam kar liya toh dusri taraf Anurag baki ke bache 1 lakh ka intejam karne mein laga hua tha. Murder contract ke pure 2 lakh ekattha hone ke baad iss plan mein 5 log shamil ho gaye the jismein the Anurag, Pragati, Durlab Yadav, history sheeter Ramji Nagar aur uska dost Shivam Yadav tha. Ab yeh log mauke ka intezaar kar rahe the ki kab Dileep apne ghar se kaam pe nikle aur usse kis tarah maut ke ghaat utar diya jaaye ki Dileep ki death logo ko murder nahi balki koi hadsa nazar aaye. Pragati Yadav aur Anurag Yadav ki yeh saazish ab antim roop le rahi thi.

Khooni Waardaat: Auraiya ka Dil Dehla Dene Wala Sach

19 March 2024, jab Dileep ne Bela gaon se wapis lautne se pehle Pragati ko call kiya tha toh Pragati ne turant hi Anurag ko Dileep ki location batayi. Anurag Dileep ki pehchaan karane Ramji Nagar, Durlab aur Shivam ko uss location tak leke gaya aur Dileep ki pehchaan karane ke baad khud wahan se nikal aaya. Iske baad yeh teeno Dileep ka peecha karna shuru karte hain jo, CCTV footages se saaf pata chal raha tha.

Dileep ka peecha karte karte wo sunsan jagah pe uski Hydra rukwate hain aur usse request karne ka natak karte hain ki unki car kharab ho gayi hai isliye unhein uski madad chahiye. Dileep unki asliyat se anjaan usne car ki location poochta hai taki wo unki help kar sake. Itni aasani se Dileep ko manta dekh Ramji Nagar apne aur Durlab ke beech usse apni bike pe baitha leta hai aur location dikhane ke bahane wo Dileep ko Paliya gaon mein gehu ke khet mein le jaata hai. Jahan Ramji Nagar ka dost Shivam dusri bike se uss location pe pahunchta hai.

Dileep uss khet mein charo taraf nazar ghumaake lekin usse wahan koi car nahi dikhti jiske liye usko wahan laya gaya tha. Wo kuch samjh pata usse pehle hi wo teeno milke usspe hamla kar dete hain. Pehle wo log usse marte peet te hain phir gun se uske sar par kai baar maarte hain. Issi garma garmi mein Durlab gusse mein aake desi gun se Dileep ke sar ke peeche goli maar deta hai [Hindustan Times]. Sabhi ko lagta hai ki Dileep mar chuka hai isliye wo Dileep ki body ko gehu ke khet mein hi chhod ke bhaag jaate hain.

Dileep ke sar par maari gayi uss goli se marta nahi hai kyunki jaisa ki movies mein dikhaya jaata hai ki sar pe goli lagne se har baar ek dum maut ho jaati hai, magar asliyat mein yeh haqiqat se bahut dur hai. Instant death ke liye brain stem ya brain tissues ka buri tarah se damage hona zaruri hai. Iss case mein Dileep ko jis gun se maara gaya usmein .315 bore ki bullet ka use hua tha jo lethal toh hoti hai lekin usmein military grade weapons jaisi precision aur power nahi hoti. Isliye .315 bore ki bullet se Dileep ki turant maut nahi hui balki uski death ka reason sar mein di gayi wo chote thi jiske chalte uska skull fractured ho gaya tha aur brain damage ho gaya tha. Jiske baad do din hospital mein apni zindagi ki ladai ladte hue uski jaan chali gayi. Auraiya Murder Case ki yeh khooni vaardaat logon ko hairan kar gayi.

Giraftari aur Sach ki Jeet | Auraiya Crime Update

Pragati aur Anurag ke hisaab se unhone plan ko bahut hoshiyari se execute kiya tha, lekin police ko mili CCTV footage se wo log ek ek kar pakad liye gaye aur unki saazish se parda bhi uth gaya. Ramji, Pragati aur Anurag ke arrest ki khabar milte hi Shivam aur Durlab bhaag jaate hain. Isliye police ne unko pakadne ke liye un dono par 25-25 hazaar ka inaam rakh diya. Iske saath hi police ne bahut jagahon pe check points bhi bana diye the.

Police ki itni koshisho ke baad, 27 March 2024 ki raat ko Shehbaazpur ke police check point ko jab Durlab aur Shivam cross karne ki koshish karte hain, toh police unko identify kar leti hai. Wo dono wahan se bhaagne ki koshish karte hain lekin police unhe pakadne ke liye unka peecha karti hai toh wo dono police pe firing shuru kar dete hain. Jawabi firing mein police dono ke pairon mein goli maar deti hai aur unhe pakad leti hai. Police ko unke paas se 2 guns, live cartridges, 1 bike, 2 mobile phone, Aadhar card aur 3000 rupees milte hain [Live Hindustan].

Filhal in 5 ko par punishment for murder, criminal conspiracy lagayi gayi jismein agar inka crime prove hoga toh inhe phasi ya umar kaid ki saza de jayegi. Lekin asliyat mein kya hoga yeh toh waqt hi batayega kyunki yeh case yeh bhi dikhata hai ki kaise hamara kanoon sangin jurm mein saza kaat rahe criminal ko bail mil jaati hai, jiske baad wo bahar aate hi ek aur jaan le leta hai. Shayad issi system ki wajah se aaj samaj mein apradhi behkauf hain kyunki unko pata hai iss desh mein toh murder karne ke baad bhi bail pe bahar aa sakte ho.

Pragati aur Anurag ne jis tarah se crime ko commit kiya wo toh iss tarah ka ki maan lo dono ko kanoon ka koi dar nahi tha. Asal mamle mein toh Pragati ne kabhi Anurag se bhi sacha pyar nahi kiya tha balki usse pyar tha us dikhawe bhari life se jisse dekh kar wo Anurag se attract ho gayi thi aur unhi jhooti sapno ki duniya ko asli duniya samajh baithi thi aur usko jeena chahathi thi. Issmei Anurag bhi barabar ka gunehgar hai kyunki wo ek aisa insaan tha jo bina mehnat ke ameero wali zindagi chahata tha. Yeh jhooti zindagi jeene ke liye Pragati ne pehle Dileep ko apne pyar ke jaal mein phasaya aur phir iss pyar ke khel ko 3 saalo tak khela. Dileep ise sacha pyar samajh baitha. Pragati itni pagal ho chuki thi apne sapno mein ki use itna khayal bhi nahi aaya ki wo apne behen ke ghar ko hi barbaad kar rahi hai. Apne saath wo apni behen ke life narak bana rahi hai. Yeh Auraiya Murder Case, pyar aur dhokhe ka ek dardnak udaharan hai.

Frequently Asked Questions (FAQs) – Auraiya Murder Case

Kya Pragati aur Dileep ki love marriage thi?

Haa, Pragati Yadav aur Dileep Singh Yadav ki love marriage thi jo 5 March 2024 ko hui thi [Aaj Tak]. Dono 3 saal se relationship mein the aur unhone apne parivar ko manane ke baad shadi ki thi.

Anurag Yadav kaun tha aur uska is case se kya rishta hai?

Anurag Yadav, jiska asli naam Manuj Kumar hai, Pragati Yadav ka premi tha. Usne hi Pragati ke saath milkar Dileep ke murder ki saazish rachi thi [Hindustan Times]. Wo jhooti shaan-o-shaukat ki zindagi jeene wala ek berozgaar insaan tha.

Operation Trinetra kya hai aur isne police ki kaise madad ki?

Operation Trinetra Uttar Pradesh government ka ek abhiyaan hai jiske tahat 1000 se zyada CCTV cameras strategic locations par install kiye gaye hain. Is system ne police ko Dileep ke route ke CCTV footage ko track karne aur uske saath dikhne wale apradhiyon ko identify karne mein madad ki, jisse saazish ka parda uth gaya [Live Hindustan].

Dileep ki maut ki asli wajah kya thi?

Dileep ki maut ki asli wajah sar par gehre ghav aur skull fracture tha, jiske baad use goli bhi maari gayi thi. .315 bore ki bullet se turant maut nahi hui thi, balki wo do din tak zindagi ki jung ladte hue hospital mein mara gaya tha. Postmortem report ne iski pushti ki [Hindustan Times].

Is khooni prem kahani par aapki kya rai hai? Hamein comment section mein batayein! Aap iss case par apne vichar hamare social media handles par bhi share kar sakte hain. Naye updates aur aur bhi sachi kahaniyon ke liye, hamare WhatsApp channel ko join karein.